Менделеевск районының Иске Гришкин авылында дүртенче мәртәбә «Җәмле Җураш буйларында» төбәкара керәшен мәдәнияте фестивале узды. Быел анда катнашырга республика буенча 50гә якын гариза килгән.
Фестиваль традицион мәдәниятне һәм аның төрле үзенчәлеген саклау, аны халыкка күрсәтү максатыннан үткәрелде. Конкурсны оештыручылар – Менделеевск районының үзәк клуб системасы, Халыклар дуслыгы йорты һәм җирле керәшеннәр оешмасы.
Катнашучыларны берничә номинация буенча сынадылар. Жюри составында Менделеевск районы керәшен оешмасы җитәкчесе Валентина Мамакова һәм Казандагы Я.Емельянов исемендәге мәдәни үзәк хезмәткәрләре — Павел Александров, Марина Казакова, Илүзә Галиуллина иде.
Мамадыш районындагы Дүсмәт авылының «Җиңгәчәйләр» керәшен халык ансамбле (җит. В.Спиридонов), «Покрау утырмасы» күренешен сәхнәләштереп, фестивальнең Гран-при бүләген алган.